गुरांच्या बाजारात ७८५ बैलांची विक्रमी आवक; खरेदीदारांच्या प्रतीक्षेत बाजार, उलाढाल मंदावली

 

मुख्य संपादक:- सौ सुनिता राजेंद्र महाडिक 

संपादक:- मुकेश राजेंद्र महाडिक 

बातमी व जाहिरातीसाठी संपर्क करा:- 9273165283

चाळीसगाव (प्रतिनिधी) : चाळीसगाव कृषी उत्पन्न बाजार समितीच्या गुरांच्या बाजारात शनिवारी मोठ्या प्रमाणावर जनावरांची आवक झाली. तब्बल ७८५ बैलांसह विविध प्रकारची गुरे विक्रीसाठी दाखल झाली, मात्र अपेक्षित प्रमाणात खरेदीदार न आल्याने बाजारातील व्यवहार मंदावल्याचे चित्र पाहायला मिळाले. कमी भावातही चांगल्या प्रतीची जनावरे उपलब्ध असूनही शेतकरी खरीप हंगामातील शेतीच्या कामात व्यस्त असल्याने बाजारात खरेदीसाठी फारशी गर्दी झाली नाही.

मागील दोन आठवडे विविध कारणांमुळे गुरांचा बाजार बंद राहिल्याने खरेदी-विक्रीचे अनेक व्यवहार रखडले होते. त्यामुळे या आठवड्यात शेतकरी, पशुपालक आणि व्यापाऱ्यांनी मोठ्या प्रमाणावर जनावरे विक्रीसाठी आणली होती. सकाळपासून बाजार परिसरात मोठी वर्दळ दिसून आली. खान्देश व मराठवाडा परिसरातील अनेक व्यापारी आणि शेतकरी बाजारात दाखल झाले होते. मात्र खरेदीदारांची संख्या कमी असल्याने दिवसभरात मोजकेच व्यवहार पूर्ण झाल्याचे दिसून आले.

चाळीसगावचा गुरांचा बाजार हा खान्देश आणि मराठवाडा भागातील प्रसिद्ध बाजार म्हणून ओळखला जातो. या बाजारात दर आठवड्याला मोठ्या प्रमाणावर गुरांची खरेदी-विक्री होत असते. विशेषतः खरीप हंगामाच्या सुरुवातीच्या काळात शेतीच्या कामांसाठी बैलांची गरज वाढत असल्याने बाजारात मोठी उलाढाल होते. यंदाही बाजारात चांगल्या प्रतीचे बैल, गायी, म्हशी, रेडे तसेच शेळ्या-मेंढ्या विक्रीसाठी उपलब्ध होत्या. मात्र पेरणीपूर्व तयारी, मशागत व इतर शेतीकामांमध्ये शेतकरी गुंतल्याने खरेदीसाठी अपेक्षित प्रतिसाद मिळाला नाही.

बाजार समितीच्या माहितीनुसार शनिवारी बाजारात ७८५ बैल, २५ गायी, ३० म्हशी, ३० रेडे, ४५ शेळ्या आणि २० मेंढ्या अशी एकूण मोठी आवक झाली. बैलांच्या संख्येमुळे बाजारात विशेष आकर्षण निर्माण झाले होते. विविध जातींच्या बैलांना त्यांच्या गुणवत्तेनुसार भाव मिळत होते. गावरान बैलांची किंमत सुमारे ६० हजार रुपयांपर्यंत होती, तर खिल्लारी जातीच्या बैलांना ९० हजार ते दीड लाख रुपयांपर्यंत दर मिळत होता. माळवी बैलांचा भाव सुमारे ७० हजार रुपये, तर लहान गोह्यांची किंमत ४० हजार रुपयांच्या आसपास होती. जाफराबादी म्हशींना ८० ते ९० हजार रुपये, गावराणी म्हशींना सुमारे ५० हजार रुपये आणि गावराणी गायींना ३० ते ६० हजार रुपयांपर्यंत भाव मिळत असल्याची माहिती मिळाली.

येथील बाजारात स्थानिक व्यापाऱ्यांसह परिसरातील जवळपास १२५ व्यापारी नियमितपणे सहभागी होतात. ऐन हंगामात दर शनिवारी ७०० ते ८०० बैल, १०० ते १५० गायी-म्हशी, २०० ते ३०० शेळ्या-मेंढ्या तसेच ८० ते ९० रेड्यांची आवक होत असते. त्यामुळे या बाजारातून दर आठवड्याला जवळपास एक कोटी रुपयांची उलाढाल होत असल्याचे सांगितले जाते. मात्र यावेळी खरेदीदारांची संख्या कमी असल्याने अपेक्षित उलाढाल झाली नाही.

याबाबत बाजार समितीचे सभापती प्रदीप पाटील यांनी सांगितले की, "पशुपालक शेतकऱ्यांनी आपली जनावरे थेट बाजार समितीच्या गुरांच्या बाजारात विक्रीसाठी आणावीत. येथे स्पर्धात्मक वातावरण असल्याने शेतकऱ्यांना योग्य भाव मिळण्यास मदत होते. बाजारात सर्व प्रकारची जनावरे उपलब्ध असून खरेदीदारांनाही दर्जेदार पर्याय मिळतात."

दरम्यान, गुरांच्या व्यापाऱ्यांनी सांगितले की, "सध्या शेतकरी पेरणीपूर्व तयारी आणि इतर शेतीच्या कामांत व्यस्त आहेत. त्यामुळे बाजारात खरेदीदारांची संख्या कमी आहे. पाऊस सुरू झाल्यानंतर शेतीकामांसाठी बैलांची मागणी वाढेल आणि बाजारातील व्यवहार तसेच उलाढालही वाढण्याची शक्यता आहे."

सध्या बाजारात चांगल्या प्रतीची जनावरे उपलब्ध असून भावही नियंत्रणात आहेत. येत्या काही दिवसांत समाधानकारक पाऊस झाल्यानंतर शेतकरी पुन्हा बाजाराकडे वळतील आणि गुरांच्या बाजारातील व्यवहारांना वेग येईल, अशी अपेक्षा व्यापारी आणि बाजार समितीकडून व्यक्त केली जात आहे. गुरांच्या मोठ्या आवकेमुळे शनिवारी बाजारात उत्साहाचे वातावरण असले तरी खरेदीदारांच्या प्रतीक्षेत अनेक विक्रेते दिवसभर थांबल्याचे चित्र पाहायला मिळाले.