उसने दिलेल्या पैशांची मागणी केल्याचा राग; लोखंडी रॉडने हल्ला, दोघांना अटक

 

मुख्य संपादक:- सौ सुनिता राजेंद्र महाडिक 

संपादक:- मुकेश राजेंद्र महाडिक 

बातमी व जाहिरातीसाठी संपर्क करा:- 9273165283

उसने दिलेल्या पैशांची परतफेड मागितल्याचा राग मनात धरून एका व्यक्तीवर लोखंडी रॉडने हल्ला करून गंभीर मारहाण केल्याची धक्कादायक घटना एरंडोल-जळगाव राष्ट्रीय महामार्गावरील साई पेट्रोल पंपासमोर घडली. या प्रकरणी एरंडोल पोलिसांनी तातडीने कारवाई करत दोघा आरोपींना अटक केली असून पुढील तपास सुरू आहे.

पोलिसांकडून मिळालेल्या माहितीनुसार, विठ्ठल आत्माराम महाजन (वय ३५, रा. विखरण, ता. एरंडोल) यांनी काही दिवसांपूर्वी कृष्णा नाना गायकवाड आणि जितेंद्र परमेश्वर वाघमारे (दोघे रा. उरुळी कांचन, हडपसर, पुणे) यांना २० हजार रुपये उसने दिले होते. दिलेल्या रकमेची परतफेड करण्याबाबत विठ्ठल महाजन यांनी वारंवार मागणी केली होती. मात्र, पैशांची मागणी केल्यामुळे आरोपींनी त्यांच्याविषयी मनात राग धरला होता.

दरम्यान, १३ जून रोजी दुपारी साडेचार वाजेच्या सुमारास एरंडोल-जळगाव राष्ट्रीय महामार्गावरील साई पेट्रोल पंपासमोर फिर्यादी विठ्ठल महाजन यांना आरोपींनी अडविले. यावेळी पैशांच्या व्यवहारावरून दोन्ही पक्षांमध्ये शाब्दिक वाद झाला. वादाचे रूपांतर काही वेळातच हाणामारीत झाले.

वाद वाढताच आरोपी कृष्णा नाना गायकवाड याने जवळ असलेल्या लोखंडी रॉडने विठ्ठल महाजन यांच्या पायावर जोरदार वार केला. अचानक झालेल्या या हल्ल्यात महाजन गंभीर जखमी झाले. त्यानंतर दुसरा आरोपी जितेंद्र परमेश्वर वाघमारे यानेही त्यांना मारहाण करत शिवीगाळ केली. तसेच जीवे मारण्याची धमकी दिल्याचे फिर्यादीने तक्रारीत नमूद केले आहे.

घटनेनंतर परिसरात काही काळ तणावाचे वातावरण निर्माण झाले होते. जखमी विठ्ठल महाजन यांना उपचारासाठी रुग्णालयात दाखल करण्यात आले. घटनेची माहिती मिळताच एरंडोल पोलिसांनी घटनास्थळी धाव घेत परिस्थिती नियंत्रणात आणली.

फिर्यादी विठ्ठल महाजन यांनी दिलेल्या तक्रारीवरून एरंडोल पोलीस ठाण्यात भारतीय न्याय संहितेच्या (बीएनएस) विविध कलमान्वये गुन्हा दाखल करण्यात आला आहे. गुन्हा दाखल होताच पोलिसांनी तपासाची चक्रे वेगाने फिरवत दोन्ही आरोपींचा शोध घेतला आणि त्यांना अटक केली.

या घटनेमुळे परिसरात खळबळ उडाली असून, केवळ पैशांच्या व्यवहारातून निर्माण झालेला वाद हिंसक स्वरूप धारण केल्याने नागरिकांमध्ये चिंता व्यक्त होत आहे. पोलिसांनी आरोपींना न्यायालयात हजर केले असून या प्रकरणाचा पुढील तपास सुरू असल्याची माहिती पोलिसांकडून देण्यात आली आहे.

उसने दिलेल्या पैशांची मागणी करणे इतक्या गंभीर हल्ल्याचे कारण ठरल्याने या घटनेची परिसरात मोठ्या प्रमाणावर चर्चा होत असून कायद्याचा धाक कायम ठेवण्यासाठी अशा प्रकारच्या गुन्ह्यांवर कठोर कारवाई करण्याची मागणी नागरिकांकडून केली जात आहे.