देशातील पहिल्या डेंग्यू प्रतिबंधक लसीला केंद्राची मंजुरी; ४ ते ६० वयोगटातील नागरिकांना होणार लाभ

 

मुख्य संपादक:- सौ सुनिता राजेंद्र महाडिक 

संपादक:- मुकेश राजेंद्र महाडिक 

बातमी व जाहिरातीसाठी संपर्क करा:- 9273165283

नवी दिल्ली : डेंग्यूसारख्या धोकादायक डासजन्य आजाराविरुद्ध लढ्यात भारताने महत्त्वपूर्ण टप्पा गाठला आहे. केंद्र सरकारने टाकेडा बायोफार्मास्युटिकल्स इंडिया कंपनीच्या 'क्यूडेंगा' (Qdenga) या डेंग्यू प्रतिबंधक लसीला भारतात बाजारात विक्रीसाठी (मार्केट ऑथोरायझेशन) अधिकृत मंजुरी दिली आहे. डेंग्यू प्रतिबंधासाठी देशात मंजुरी मिळालेली ही पहिलीच लस असून, यामुळे डेंग्यू नियंत्रणाच्या प्रयत्नांना मोठे बळ मिळणार असल्याचे मानले जात आहे.

सेंट्रल ड्रग्स स्टँडर्ड कंट्रोल ऑर्गनायझेशन (CDSCO) ने लसीची गुणवत्ता, सुरक्षितता आणि परिणामकारकतेचे सर्वंकष मूल्यमापन केल्यानंतर ही मंजुरी दिली आहे. औषधे आणि सौंदर्यप्रसाधने अधिनियम, १९४० अंतर्गत ही परवानगी देण्यात आली असून, भारतातील सार्वजनिक आरोग्य व्यवस्थेसाठी हा महत्त्वाचा निर्णय मानला जात आहे.

'क्यूडेंगा' ही रिकॉम्बिनंट डीएनए तंत्रज्ञानावर आधारित 'लाइव्ह अॅटेन्युएटेड टेट्राव्हॅलेंट' लस आहे. ही लस डेंग्यू विषाणूच्या चारही प्रकारांपासून संरक्षण देण्यासाठी विकसित करण्यात आली आहे. लस त्वचेखाली (सबक्युटेनियस) इंजेक्शनद्वारे दिली जाणार असून ४ ते ६० वर्षे वयोगटातील व्यक्तींना ती देण्यात येणार आहे. लसीकरणासाठी ०.५ मिलीचे दोन डोस दिले जातील. पहिला डोस दिल्यानंतर तीन महिन्यांनी दुसरा डोस घेणे आवश्यक असेल.

ही लस जर्मनीतील टाकेडा जीएमबीएच येथे तयार केली जाणार असून, भारतात टाकेडा बायोफार्मास्युटिकल्स इंडिया मार्फत तिची आयात आणि वितरण केले जाईल. भारतातील फेज-३ क्लिनिकल चाचण्यांसह ब्राझील, थायलंड आणि श्रीलंका यांसारख्या देशांमध्ये झालेल्या व्यापक संशोधनाच्या सकारात्मक निष्कर्षांच्या आधारे या लसीला मंजुरी देण्यात आली आहे.

जागतिक स्तरावरही 'क्यूडेंगा'ला मोठी मान्यता मिळाली आहे. आतापर्यंत ४२ देशांनी या लसीच्या वापरास परवानगी दिली असून, तिला जागतिक आरोग्य संघटनेची (WHO) प्री-क्वालिफिकेशन मान्यताही मिळाली आहे. जगभरात या लसीचे २.४ कोटींहून अधिक डोस वितरित करण्यात आले असून, तिची सुरक्षितता आणि परिणामकारकता सिद्ध झाल्याचा दावा करण्यात आला आहे.

दरवर्षी पावसाळ्यात डेंग्यूच्या रुग्णसंख्येत मोठी वाढ होत असल्याने ही लस भारतासाठी महत्त्वाची ठरणार आहे. डेंग्यूमुळे होणारे गंभीर आजार, रुग्णालयात दाखल होण्याचे प्रमाण आणि मृत्यू कमी करण्यासाठी या लसीचा मोठा फायदा होईल, असा विश्वास आरोग्य क्षेत्रातील तज्ज्ञांनी व्यक्त केला आहे. तसेच डास नियंत्रण, स्वच्छता आणि जनजागृती यांसह लसीकरणामुळे डेंग्यूविरोधातील देशाची लढाई अधिक प्रभावी होण्याची अपेक्षा आहे.