जळगावमध्ये मोठा विमा घोटाळा; बनावट अपघात प्रकरणात पोलीस कर्मचाऱ्यांनाही अटक

 

मुख्य संपादक:- सौ सुनिता राजेंद्र महाडिक 

संपादक:- मुकेश राजेंद्र महाडिक 

बातमी व जाहिरातीसाठी संपर्क करा:- 9273165283

जिल्ह्यात अत्यंत धक्कादायक आणि खळबळजनक प्रकार उघडकीस आला असून नैसर्गिक मृत्यू झालेल्या एका व्यक्तीचा बनावट अपघाती मृत्यू दाखवून विमा कंपन्यांकडून कोट्यवधी रुपयांची भरपाई लाटण्याचा कट रचण्यात आल्याचे समोर आले आहे. या प्रकरणात चार पोलीस कर्मचारी, एक वैद्यकीय अधिकारी, विमा प्रतिनिधी आणि मृत व्यक्तीचे नातेवाईक अशा एकूण नऊ जणांवर गुन्हा दाखल करून त्यांना अटक करण्यात आली आहे.

ही कारवाई मेहुणबारे (ता. चाळीसगाव) पोलीस ठाण्यात नोंदवलेल्या गुन्ह्यानंतर करण्यात आली. या संपूर्ण प्रकरणाची माहिती जिल्हा पोलीस अधीक्षक डॉ. महेश्वर रेड्डी यांनी पत्रकार परिषदेत दिली.

हृदयविकाराने मृत्यू, पण अपघात दाखवण्याचा कट

नाशिक जिल्ह्यातील सटाणा येथील राजेंद्र जाधव हे हृदयविकाराने आजारी होते. दरम्यान, काही विमा प्रतिनिधींनी त्यांना बांधकाम व्यावसायिक असल्याचे दाखवत विविध विमा कंपन्यांकडून सुमारे साडेसात कोटी रुपयांचा विमा उतरवून घेतला होता.

फेब्रुवारी २०२४ मध्ये राजेंद्र जाधव यांचा नैसर्गिक मृत्यू झाला. नैसर्गिक मृत्यू असल्यामुळे विमा पॉलिसीच्या अटींनुसार त्यांच्या कुटुंबाला विमा भरपाई मिळू शकली नाही.

एप्रिल २०२५ मध्ये बनावट अपघाताची कथा

विमा रक्कम मिळवण्यासाठी एप्रिल २०२५ मध्ये मोठा कट रचण्यात आला. त्यानुसार जळगाव जिल्ह्यातील चाळीसगाव तालुक्यातील मेहुणबारे पोलीस ठाण्याच्या हद्दीत राजेंद्र जाधव यांचा अपघाती मृत्यू झाल्याचे बनावट प्रकरण तयार करण्यात आले.

या कटात सहभागी असलेल्या काही जणांनी:

मृतदेह अस्तित्वात नसतानाही पोस्टमॉर्टेम (उत्तरीय तपासणी) झाल्याचे दाखवले

अपघाताचा बनावट पंचनामा तयार केला

अपघातात सहभागी झालेल्या चारचाकी वाहन आणि दुचाकी दाखवून कागदपत्रे तयार केली

पोलिसांकडून तपास झाल्याचा आभास निर्माण केला

पोलिस कर्मचाऱ्यांचा सहभाग

या बनावट प्रकरणात काही पोलीस कर्मचाऱ्यांची मदत घेण्यात आली. चाळीसगाव शहर पोलीस ठाण्याचे दोन कर्मचारी घटनास्थळी जाऊन चौकशीचे सोपस्कार पूर्ण केल्याचे दाखवले. तसेच मेहुणबारे पोलीस ठाण्याच्या हद्दीत अपघात घडल्याचा दाखला देण्यासाठी बीट हवालदारासह अन्य कर्मचाऱ्यांनी आवश्यक कागदपत्रे तयार करण्यात मदत केल्याचे तपासात उघड झाले.

विमा कंपनीला संशय

काही दिवसांनी विमा कंपन्यांकडे राजेंद्र जाधव यांच्या अपघाती मृत्यूच्या आधारे भरपाईसाठी दावा दाखल करण्यात आला. मात्र कागदपत्रांची पडताळणी करताना एका विमा कंपनीला काही विसंगती आढळून आली.

यानंतर विमा कंपनीच्या अधिकाऱ्यांनी मृत व्यक्तीच्या पत्नीशी संपर्क साधला. तिच्या उत्तरांमुळे संशय अधिकच वाढला. त्यानंतर सखोल चौकशी करण्यात आली असता संपूर्ण अपघाताचे प्रकरण बनावट असल्याचे उघड झाले.

विमा कंपनीच्या अधिकाऱ्याची फिर्याद

या प्रकरणी विमा कंपनीचे अधिकारी किरण रावसाहेब शिंदे यांनी थेट मेहुणबारे पोलीस ठाण्यात फिर्याद दाखल केली. त्यानंतर पोलिसांनी तपास सुरू करून संपूर्ण कटाचा पर्दाफाश केला.

नऊ जण अटकेत

पोलिसांनी या प्रकरणात पुरावे गोळा करून एकूण नऊ जणांना अटक केली आहे. त्यामध्ये:

विमा प्रतिनिधी प्रवीण पाटील

प्रेम पाटील

वैद्यकीय अधिकारी डॉ. मंदार कळंबेकर

मेहुणबारे पोलीस ठाण्याचे कर्मचारी सचिन निकम

रवींद्र बत्तीसे

चाळीसगाव शहर पोलीस ठाण्याचे कर्मचारी महेंद्र पाटील

सुनील निकम

मृत व्यक्तीची पत्नी अरुणा जाधव

भाऊ मिथून जाधव

यांचा समावेश आहे.

आणखी आरोपींचा शोध

या संपूर्ण प्रकरणामुळे जळगाव जिल्ह्यात मोठी खळबळ उडाली आहे. विमा कंपनीकडून साडेसात कोटी रुपयांची भरपाई मिळवण्याचा प्रयत्न या कटातून केला जात असल्याचे स्पष्ट झाले आहे.

पोलिसांच्या मते या प्रकरणामागे आणखी काही व्यक्तींचा सहभाग असण्याची शक्यता असून त्या दृष्टीने तपास सुरू आहे.