चाळीसगाव शहर पोलिसांची मोठी कामगिरी; गर्दीत दागिने लांबवणारी सराईत महिला चोर गजाआड

 

मुख्य संपादक:- सौ सुनिता राजेंद्र महाडिक 

संपादक:- मुकेश राजेंद्र महाडिक 

बातमी व जाहिरातीसाठी संपर्क करा:- 9273165283

चाळीसगाव शहरातील गर्दीच्या ठिकाणी महिलांच्या अंगावरील दागिने तसेच मौल्यवान ऐवज चोरणाऱ्या सराईत महिला आरोपीला चाळीसगाव शहर पोलिसांच्या गुन्हे शोध पथकाने शिताफीने ताब्यात घेतले आहे. या कारवाईमुळे चाळीसगाव शहर पोलीस ठाण्यात दाखल असलेले चोरीचे तब्बल चार गुन्हे उघडकीस आले असून, तीन गुन्ह्यांमधील चोरीस गेलेला १०० टक्के मुद्देमाल पोलिसांनी हस्तगत केला आहे. तसेच एका गुन्ह्यातील १० हजार रुपये रोख रक्कमही जप्त करण्यात आली आहे.

ज्योती संतोष चव्हाण (रा. जि. जालना) असे ताब्यात घेण्यात आलेल्या महिला आरोपीचे नाव आहे. चाळीसगाव शहर हद्दीत मागील काही काळापासून गर्दीच्या ठिकाणी महिलांना हेरून त्यांच्या अंगावरील दागिने व मौल्यवान वस्तू लंपास करण्याच्या घटना घडत होत्या. या घटनांमुळे नागरिकांमध्ये चिंता निर्माण झाली होती. या पार्श्वभूमीवर चाळीसगाव शहर पोलिसांनी चोरीच्या घटनांचा तपास सुरू करून संशयितांवर बारकाईने लक्ष ठेवले.

पोलिसांनी तांत्रिक माहिती, गोपनीय खबऱ्यांचे जाळे तसेच उपलब्ध पोलीस अभिलेखांच्या आधारे तपासाची दिशा निश्चित केली. तपासादरम्यान मिळालेल्या माहितीच्या आधारे पोलिसांनी ज्योती चव्हाण हिला ताब्यात घेतले. तिची सखोल चौकशी केल्यानंतर तिने संबंधित चोरीच्या गुन्ह्यांमध्ये सहभाग असल्याची कबुली दिल्याचे पोलिसांनी सांगितले.

पोलीस निरीक्षक अमित कुमार मनेळ यांच्या नेतृत्वाचे कौतुक

चाळीसगाव शहरातील गर्दीच्या ठिकाणी महिलांच्या अंगावरील दागिने व मौल्यवान ऐवज चोरीच्या घटनांना आळा घालत सराईत महिला आरोपीला जेरबंद करण्यात पोलीस निरीक्षक अमित कुमार मनेळ यांच्या नेतृत्वाची महत्त्वपूर्ण भूमिका ठरली. चोरीच्या सलग घटनांची गांभीर्याने दखल घेत त्यांनी गुन्हे शोध पथकाला योग्य दिशा देत तपासाची चक्रे वेगाने फिरवली. तांत्रिक माहिती, गोपनीय खबऱ्यांकडून मिळणारी माहिती आणि उपलब्ध पोलीस अभिलेखांचा बारकाईने अभ्यास करून संशयितापर्यंत पोहोचण्यात पोलिसांना यश आले.

आरोपीला ताब्यात घेतल्यानंतर सखोल चौकशीच्या माध्यमातून चार गुन्ह्यांची उकल करण्यात आली. विशेष म्हणजे, तीन गुन्ह्यांमधील चोरीस गेलेला संपूर्ण मुद्देमाल तसेच एका गुन्ह्यातील १० हजार रुपयांची रोख रक्कम जप्त करण्यात आली. त्यांच्या नियोजनबद्ध नेतृत्वामुळे या कारवाईला यश मिळाले असून, नागरिकांमध्ये पोलिसांबद्दलचा विश्वास अधिक दृढ झाला आहे. गुन्हेगारीवर वचक निर्माण करण्यासाठी मनेळ यांच्या नेतृत्वाखाली पोलिसांकडून सुरू असलेली कार्यवाही निश्चितच कौतुकास्पद ठरत आहे.

आरोपीच्या चौकशीतून चाळीसगाव शहर पोलीस ठाण्यातील गुन्हा रजिस्टर क्रमांक १७५/२०२६, ६९/२०२६, ६७/२०२६ आणि ३०९/२०२६ हे चार गुन्हे उघडकीस आले. यातील तीन गुन्ह्यांमध्ये चोरीस गेलेला संपूर्ण मुद्देमाल पोलिसांनी हस्तगत केला आहे. तर एका गुन्ह्यातील १० हजार रुपयांची रोख रक्कम जप्त करण्यात आली आहे. त्यामुळे या कारवाईला पोलिसांच्या तपासाच्या दृष्टीने महत्त्वपूर्ण यश मानले जात आहे.

ही कारवाई जळगाव जिल्हा पोलीस अधीक्षक श्रीकांत ढिवरे, अपर पोलीस अधीक्षक अशोक नखाते आणि उपविभागीय पोलीस अधिकारी विजयकुमार ठाकूर यांच्या मार्गदर्शनाखाली, पोलीस निरीक्षक अमित कुमार मनेळ यांच्या नेतृत्वाखाली करण्यात आली.

या प्रकरणाचा पुढील सखोल तपास पोलीस हेड कॉन्स्टेबल प्रवीण जाधव, राहुल सोनवणे आणि नितीन आगोणे करीत आहेत.

कारवाईत पोलीस अंमलदार प्रवीण जाधव, राहुल सोनवणे, नितीन आगवणे, योगेश बेलदार, किशोर पाटील, योगेश मांडोळे, दत्तू साळवे, विकास पाटील, कल्पेश पगारे, निलेश पाटील, ज्ञानेश्वर पाटोळे, राकेश महाजन आणि प्रवीण पवार यांनी सहभाग घेतला. तसेच महिला पोलीस अंमलदार विमल सानप, मालती बच्छाव, अनिता सुरवाडे आणि स्नेहल मांडोळे यांनीही कारवाईत महत्त्वाची भूमिका बजावली.

गर्दीच्या ठिकाणी महिलांना लक्ष्य करून चोरी करणाऱ्या सराईत आरोपीला ताब्यात घेत चार गुन्ह्यांची उकल केल्याने चाळीसगाव शहर पोलिसांच्या या कामगिरीचे नागरिकांकडून कौतुक होत आहे.