एसटी बसस्थानक परिसरातील अवैध प्रवासी वाहतुकीवर कठोर कारवाईचे निर्देश; २०० मीटर नियमाची प्रभावी अंमलबजावणी होणार?

 

मुख्य संपादक:- सौ सुनिता राजेंद्र महाडिक 

संपादक:- मुकेश राजेंद्र महाडिक 

बातमी व जाहिरातीसाठी संपर्क करा:- 9273165283

मुंबई : राज्यातील सर्वसामान्य नागरिकांची जीवनवाहिनी म्हणून ओळखल्या जाणाऱ्या महाराष्ट्र राज्य मार्ग परिवहन महामंडळाच्या (एसटी) उत्पन्नावर परिणाम करणारी आणि प्रवाशांच्या सुरक्षेला धोका निर्माण करणारी अवैध प्रवासी वाहतूक कोणत्याही परिस्थितीत सहन केली जाणार नाही, असा ठाम इशारा परिवहन मंत्री सरनाईक यांनी दिला आहे. राज्यभरातील बसस्थानक परिसरात बेकायदेशीर प्रवासी वाहतुकीला आळा घालण्यासाठी प्रशासन, पोलीस यंत्रणा आणि परिवहन विभागाने समन्वयाने कठोर कारवाई करावी, असे निर्देश त्यांनी दिले आहेत.

परिवहन मंत्री सरनाईक यांनी सांगितले की, प्रवाशांना सुरक्षित, शिस्तबद्ध आणि दर्जेदार प्रवासी सेवा उपलब्ध करून देणे हे एसटी महामंडळाचे प्रमुख उद्दिष्ट आहे. मात्र, अनेक बसस्थानकांच्या परिसरात खासगी वाहने बेकायदेशीरपणे उभी करून प्रवासी वाहतूक केली जात असल्याने एसटीच्या महसुलावर मोठा परिणाम होत आहे. याशिवाय, अनधिकृत वाहतुकीमुळे प्रवाशांच्या सुरक्षेचाही गंभीर प्रश्न निर्माण होत असून वाहतूक व्यवस्थेत गोंधळ वाढत आहे.

या पार्श्वभूमीवर राज्यातील सर्व संबंधित विभागांनी समन्वय साधून बसस्थानक परिसरात कायद्याची काटेकोर अंमलबजावणी करावी, तसेच अवैध प्रवासी वाहतूक पूर्णपणे बंद करण्यासाठी प्रभावी उपाययोजना राबवाव्यात, असे स्पष्ट निर्देश मंत्र्यांनी दिले आहेत. यासाठी स्थानिक प्रशासन, पोलीस विभाग आणि परिवहन विभागाने संयुक्त मोहीम राबवून नियमभंग करणाऱ्यांवर कठोर कारवाई करण्याचेही आदेश देण्यात आले आहेत.

दरम्यान, एसटी बसस्थानकांच्या २०० मीटर परिसरात खासगी वाहने उभी करून प्रवासी घेणे किंवा उतरविण्यास बंदी घालणारा शासनाचा आदेश यापूर्वीपासूनच अस्तित्वात आहे. मात्र, अनेक ठिकाणी या आदेशाची प्रभावी अंमलबजावणी होत नसल्याचे वास्तव समोर आले आहे. संबंधित नियमाकडे सातत्याने दुर्लक्ष होत असल्याने हा आदेश केवळ कागदोपत्रीच राहिल्याची टीका विविध स्तरातून करण्यात येत आहे.

बसस्थानक परिसरात सर्रास खासगी वाहने उभी राहत असल्याने एसटी बससेवेला आर्थिक फटका बसत आहे. अनेक प्रवासी खासगी वाहनांकडे वळत असल्याने महामंडळाच्या उत्पन्नात घट होत असून त्याचा परिणाम सार्वजनिक वाहतूक व्यवस्थेवर होत आहे. तसेच, अनधिकृत वाहतुकीमुळे वाहतूक कोंडी, अपघातांचा धोका आणि प्रवाशांच्या सुरक्षिततेचे प्रश्न अधिक गंभीर बनत आहेत.

परिवहन मंत्र्यांच्या नव्या निर्देशांनंतर आता राज्यभरात अवैध प्रवासी वाहतुकीविरोधात विशेष मोहीम राबविली जाण्याची शक्यता आहे. विशेषतः बसस्थानकांच्या २०० मीटर परिसरातील नियमांची यावेळी काटेकोर अंमलबजावणी होते का आणि प्रशासन प्रत्यक्षात कितपत कठोर भूमिका घेते, याकडे एसटी कर्मचारी, प्रवासी आणि सर्वसामान्य नागरिकांचे लक्ष लागले आहे.