चाळीसगावात १३ वर्षीय मुलीवर अत्याचार; अल्पवयीन मैत्रिणीच्या मदतीने कृत्य केल्याचा आरोप, दोघांना अटक

 

मुख्य संपादक:- सौ सुनिता राजेंद्र महाडिक

संपादक:- मुकेश राजेंद्र महाडिक 

बातमी व जाहिरातीसाठी संपर्क करा:- 9273165283

चाळीसगाव : जळगाव जिल्ह्यातील चाळीसगाव शहरात १३ वर्षीय अल्पवयीन मुलीवर अत्याचार झाल्याची धक्कादायक घटना समोर आली आहे. या प्रकरणात पीडित मुलीच्या १६ वर्षीय अल्पवयीन मैत्रिणीने आरोपींना मदत केल्याचा आरोप करण्यात आला आहे. याप्रकरणी चाळीसगाव पोलीस ठाण्यात भारतीय न्याय संहितेतील संबंधित कलमांसह बाल लैंगिक अत्याचार प्रतिबंधक (POCSO) कायद्यान्वये गुन्हा दाखल करण्यात आला असून, दोन तरुणांना पोलिसांनी अटक केली आहे. प्रकरणाचा पुढील तपास सुरू आहे.

कामाच्या ठिकाणी आईसोबत गेली होती पीडिता

पोलिसांकडून मिळालेल्या माहितीनुसार, घटनेच्या दिवशी पीडित मुलगी आपल्या आईसोबत कामाच्या ठिकाणी गेली होती. काम सुरू असताना तिची आई काही वेळासाठी पाणी भरण्यासाठी घरी गेली. याच दरम्यान पीडित मुलीची १६ वर्षीय मैत्रीण तेथे आली. तिने एका कारणाचा बहाणा करून पीडित मुलीला महिलांच्या स्वच्छतागृहाकडे नेल्याचा आरोप फिर्यादीत करण्यात आला आहे.

स्वच्छतागृहात दोघे तरुण उपस्थित असल्याचा आरोप

पीडित मुलगी स्वच्छतागृहात पोहोचली असता राहुल आणि आर्या हे दोघे तरुण तेथे आधीपासून उपस्थित असल्याचे तपासात समोर आल्याचे पोलिसांनी सांगितले. त्यानंतर राहुल याने पीडित मुलीवर अत्याचार केल्याचा आरोप आहे. पीडित मुलीने विरोध करण्याचा आणि मदतीसाठी आरडाओरडा करण्याचा प्रयत्न केला असता, तिच्या अल्पवयीन मैत्रिणीने तिचे तोंड दाबून हात पकडल्याचे फिर्यादीत नमूद आहे.

यानंतर आर्या यानेही पीडित मुलीवर अत्याचार केल्याचा आरोप करण्यात आला आहे. तक्रारीनुसार, दोन्ही आरोपींनी आलटून-पालटून अत्याचार केल्याचे नमूद करण्यात आले असून, त्यानंतर राहुल याने पुन्हा अत्याचार केल्याचाही आरोप आहे.

तक्रार केल्यास धमकी दिल्याचा आरोप

घटनेनंतर पीडित मुलीला याबाबत कुणाला सांगू नये, तसेच तक्रार केल्यास परिणाम भोगावे लागतील, अशा स्वरूपाची धमकी देण्यात आल्याचा आरोप तक्रारीत करण्यात आला आहे. घटनेनंतर प्रकरणाची माहिती पोलिसांपर्यंत पोहोचल्यानंतर पोलिसांनी तातडीने तपास सुरू केला.

या प्रकरणी चाळीसगाव पोलीस ठाण्यात भारतीय न्याय संहिता तसेच POCSO कायद्यान्वये गुन्हा दाखल करण्यात आला आहे. पोलिसांनी दोन आरोपींना अटक केली असून, घटनेतील इतर व्यक्तींची भूमिका, अल्पवयीन मैत्रिणीची नेमकी भूमिका आणि घटनेशी संबंधित इतर बाबींचा तपास सुरू आहे.

अल्पवयीन पीडितेची ओळख कायद्यानुसार गोपनीय ठेवण्यात आली असून, तिचे नाव, छायाचित्र किंवा ओळख पटेल अशी कोणतीही माहिती प्रसिद्ध करण्यात आलेली नाही. प्रकरणाचा पुढील तपास चाळीसगाव पोलीस करीत आहेत.