बातमी व जाहिरातीसाठी संपर्क करा:-9273165283
भुसावळमध्ये इंडिया–पाक सामना सट्टा रॅकेटवर छापा; दोन जेरबंद, १.०५ लाखांचा मुद्देमाल जप्त
जळगाव – भारत विरुद्ध पाकिस्तान क्रिकेट सामन्याच्या पार्श्वभूमीवर भुसावळ शहरात ऑनलाईन बेटिंग (सट्टा) सुरू असल्याची गुप्त माहिती मिळताच स्थानिक गुन्हे शाखेने छापा टाकून दोन इसमांना जेरबंद केले. या कारवाईत १ लाख ५ हजार रुपयांचा मुद्देमाल हस्तगत करण्यात आला आहे.
स्थानिक गुन्हे शाखेचे पोउपनि शरद बागल व त्यांच्या पथकाला गोपनीय माहिती मिळाली की, भुसावळ येथील सिंधी कॉलनीतील नवजीवन सोसायटीमध्ये प्रकाश हुंदामल सारडा (वय ५५) आपल्या राहत्या घरी क्रिकेट सामन्यावर ऑनलाईन बेटिंग चालवित आहे. वरिष्ठ पोलीस निरीक्षक राहुल गायकवाड यांच्या मार्गदर्शनाखाली शनिवारी (दि.२१ सप्टेंबर) पंचांसह पथकाने छापा टाकला.
कारवाईदरम्यान प्रकाश सारडा याच्यासह रणजीत चत्रधान हंडी (वय ३५, रा. गणपती नगर, जळगाव) हे दोघे इंडिया–पाक सामना सुरू असताना ऑनलाईन सट्टा खेळविताना पकडले गेले. त्यांच्या ताब्यातून एक लॅपटॉप, तीन मोबाईल फोन, एक कॅलक्युलेटर, २९ छापील स्लिप्स असे साहित्य जप्त करण्यात आले. या सर्व मुद्देमालाची एकूण किंमत १,०५,००० रुपये एवढी आहे.
या प्रकरणी भुसावळ बाजारपेठ पोलीस ठाण्यात सीसीटीएनएस गुन्हा क्र. ४५८/२०२५ महाराष्ट्र जुगार अधिनियम कलम ४, ५ अन्वये गुन्हा दाखल करण्यात आला आहे.
सदरची कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी संदीप गावित, वरिष्ठ पोलीस निरीक्षक राहुल गायकवाड यांच्या मार्गदर्शनाखाली करण्यात आली. पथकात पोउपनि शरद बागल, पोउपनि रवि नरवाडे, पोहकं उमाकांत पाटील, पोना विकास सातदिवे, पोको राहुल वानखेडे, प्रशांत परदेशी, मपोकों दर्शना पाटील व चा.पोहेको भरत पाटील (सर्व स्थागुशा जळगाव) यांचा समावेश होता.
या कारवाईमुळे भुसावळ व परिसरातील ऑनलाईन सट्टेबाजांमध्ये चांगलीच धाकधूक निर्माण झाली आहे.
Post a Comment
0 Comments