घाट रोड पोलीस चौकीसमोरील लोकनेते अनिलदादा कॉम्प्लेक्समध्ये पावसाच्या पाण्याचा विळखा; तळ्यासारखी परिस्थिती, नागरिक त्रस्त

 

मुख्य संपादक:- सौ सुनिता राजेंद्र महाडिक 

संपादक:- मुकेश राजेंद्र महाडिक 

बातमी व जाहिरातीसाठी संपर्क करा:- 9273165283

चाळीसगाव | प्रतिनिधी

चाळीसगाव शहरातील घाट रोड पोलीस चौकीसमोरील लोकनेते अनिलदादा कॉम्प्लेक्समध्ये पावसाळा सुरू होताच गंभीर समस्या निर्माण झाली आहे. रस्त्यावर साचणारे पावसाचे पाणी थेट कॉम्प्लेक्सच्या तळमजल्यावरील गाळ्यांमध्ये आणि आवारात शिरत असल्याने संपूर्ण परिसराला अक्षरशः तळ्याचे स्वरूप आले आहे. या समस्येमुळे गाळेधारक, व्यावसायिक, रहिवासी तसेच वाहनधारकांना मोठ्या अडचणींचा सामना करावा लागत असून, नागरिकांमध्ये तीव्र नाराजी व्यक्त होत आहे.

स्थानिक नागरिकांच्या म्हणण्यानुसार, घाट रोड परिसरात रस्त्यावरील पाण्याचा योग्य निचरा होण्यासाठी आवश्यक असलेली गटार व्यवस्था अपुरी असून काही ठिकाणी गटारच नसल्याने पावसाचे संपूर्ण पाणी उताराने थेट कॉम्प्लेक्सच्या दिशेने वाहत येते. काही वर्षांपूर्वी रस्त्याचे उंचीकरण आणि डांबरीकरण करण्यात आले. मात्र त्यावेळी आवश्यक त्या प्रमाणात भराव टाकण्यात आला नाही आणि पाणी वाहून जाण्यासाठी ड्रेनेजची प्रभावी व्यवस्था करण्यात आली नाही. परिणामी, प्रत्येक पावसात कॉम्प्लेक्सच्या परिसरात मोठ्या प्रमाणावर पाणी साचते.

सध्या कॉम्प्लेक्सच्या आवारात अनेक दिवसांपासून पाणी साचून राहिल्याने दुर्गंधी पसरली असून डासांचा प्रादुर्भावही मोठ्या प्रमाणात वाढला आहे. या परिसरात लहान मुले, ज्येष्ठ नागरिक आणि कुटुंबे वास्तव्यास असल्याने डेंग्यू, मलेरिया तसेच इतर साथीच्या आजारांचा धोका निर्माण झाला आहे. पाण्यामुळे परिसर अस्वच्छ बनला असून नागरिकांच्या आरोग्याचा प्रश्न ऐरणीवर आला आहे.

कॉम्प्लेक्समधील गाळेधारक आणि व्यावसायिकांचेही मोठे आर्थिक नुकसान होत आहे. पावसाचे पाणी थेट गाळ्यांमध्ये शिरत असल्याने मालाचे नुकसान होण्याची भीती कायम असते. ग्राहकांनाही पाण्यातून वाट काढत दुकानांपर्यंत जावे लागत असल्याने व्यवसायावर विपरीत परिणाम होत असल्याची खंत व्यावसायिकांनी व्यक्त केली.

वाहनधारकांनाही या समस्येचा मोठा फटका बसत आहे. कॉम्प्लेक्समध्ये दुचाकी किंवा चारचाकी वाहन ने-आण करताना पाण्यातून मार्ग काढावा लागतो. अनेकदा वाहनांचे इंजिन बंद पडण्याच्या घटना घडतात. चिखल, घसरडा रस्ता आणि साचलेल्या पाण्यामुळे अपघाताचा धोका देखील वाढला आहे.

स्थानिक नागरिकांनी सांगितले की, या समस्येबाबत अनेक वेळा नगरपालिकेकडे तक्रारी करण्यात आल्या. संबंधित अधिकाऱ्यांना प्रत्यक्ष परिस्थिती दाखवून देण्यात आली. मात्र अद्याप कोणतीही कायमस्वरूपी उपाययोजना करण्यात आलेली नाही. प्रत्येक पावसाळ्यात हीच परिस्थिती निर्माण होत असून नागरिकांना मोठ्या त्रासाला सामोरे जावे लागत आहे.

नागरिकांनी नगरपालिकेकडे तातडीने रस्त्यावरील पाण्याचा योग्य निचरा होण्यासाठी नवीन गटार बांधणे, आवश्यक त्या ठिकाणी ड्रेनेज लाईन टाकणे, रस्त्याची उंची आणि उतार यामध्ये तांत्रिक सुधारणा करणे तसेच कॉम्प्लेक्समध्ये शिरणारे पावसाचे पाणी रोखण्यासाठी कायमस्वरूपी उपाययोजना करण्याची मागणी केली आहे.

घाट रोड पोलीस चौकीसमोरील लोकनेते अनिलदादा कॉम्प्लेक्समधील ही गंभीर समस्या तातडीने सोडवली नाही तर भविष्यात नागरिकांच्या आरोग्यावर तसेच मालमत्तेवर मोठा परिणाम होण्याची भीती व्यक्त केली जात आहे. त्यामुळे नगरपालिकेने केवळ पाहणी न करता त्वरित प्रत्यक्ष काम हाती घेऊन नागरिकांना दिलासा द्यावा, अशी एकमुखी मागणी परिसरातील रहिवासी, गाळेधारक आणि व्यापाऱ्यांनी केली आहे.