२७ ऑक्टोबरला प्रसिद्ध होणार अंतिम मतदार यादी; विशेष संक्षिप्त पुनरीक्षण कार्यक्रमाचे सुधारित वेळापत्रक जाहीर

 

मुख्य संपादक:- सौ सुनिता राजेंद्र महाडिक 

संपादक:- मुकेश राजेंद्र महाडिक 

बातमी व जाहिरातीसाठी संपर्क करा:- 9273165283

मुंबई : भारत निवडणूक आयोगाने महाराष्ट्रातील १ ऑक्टोबर २०२६ हा अर्हता दिनांक निश्चित करून सुरू असलेल्या विशेष संक्षिप्त मतदार यादी पुनरीक्षण कार्यक्रमाच्या वेळापत्रकात महत्त्वपूर्ण सुधारणा केली आहे. आगामी निवडणुकांच्या पार्श्वभूमीवर मतदार यादी अधिक अचूक, अद्ययावत आणि पारदर्शक करण्यासाठी हा कार्यक्रम राबविण्यात येत असून, त्याअंतर्गत विविध टप्प्यांचे नवीन वेळापत्रक जाहीर करण्यात आले आहे. या सुधारित कार्यक्रमानुसार अंतिम मतदार यादी २७ ऑक्टोबर २०२६ रोजी प्रसिद्ध करण्यात येणार असल्याची माहिती भारत निवडणूक आयोगाने दिली आहे.

सुधारित वेळापत्रकानुसार बूथ लेव्हल अधिकारी (बीएलओ) ३० जून ते १७ ऑगस्ट २०२६ या कालावधीत घरोघरी जाऊन मतदारांची पडताळणी करणार आहेत. या भेटीदरम्यान मतदारांची माहिती अद्ययावत करणे, नव्या पात्र नागरिकांची नोंदणी करणे, मृत किंवा स्थलांतरित मतदारांची माहिती तपासणे तसेच मतदार यादीतील त्रुटी दूर करण्याचे काम करण्यात येणार आहे. त्यामुळे मतदार यादीतील अचूकता वाढण्यास मदत होणार आहे.

याच कालावधीत मतदान केंद्रांचे तर्कसंगतीकरण आणि पुनर्रचना करण्याचे कामही हाती घेण्यात आले असून, हे काम १७ ऑगस्ट २०२६ पर्यंत पूर्ण केले जाणार आहे. मतदारांना अधिक सुलभ आणि सोयीस्कर मतदानाची सुविधा उपलब्ध व्हावी, तसेच मतदान केंद्रांवरील गर्दी कमी व्हावी, यासाठी आवश्यक त्या बदलांची अंमलबजावणी केली जाईल.

मतदार यादीचा प्रारूप मसुदा २४ ऑगस्ट २०२६ रोजी प्रसिद्ध करण्यात येईल. त्यानंतर २४ ऑगस्ट ते २३ सप्टेंबर २०२६ या कालावधीत नागरिकांकडून दावे आणि हरकती स्वीकारण्यात येतील. नाव समाविष्ट करणे, चुकीची माहिती दुरुस्त करणे, पत्ता बदलणे किंवा अपात्र नाव वगळण्याबाबत नागरिकांना अर्ज करण्याची संधी या कालावधीत उपलब्ध राहणार आहे.

प्राप्त झालेल्या सर्व दावे आणि हरकतींवर संबंधित निवडणूक अधिकाऱ्यांकडून सुनावणी घेऊन त्यांचा निपटारा २४ ऑगस्ट ते २२ ऑक्टोबर २०२६ या कालावधीत केला जाईल. सर्व अर्जांची पडताळणी करून पात्र अर्ज मंजूर करण्यात येतील, तर नियमांनुसार अपात्र अर्ज फेटाळले जातील.

या सर्व प्रक्रिया पूर्ण झाल्यानंतर अंतिम मतदार यादी २७ ऑक्टोबर २०२६ रोजी प्रसिद्ध करण्यात येणार आहे. निवडणूक आयोगाने पात्र नागरिकांनी या पुनरीक्षण प्रक्रियेत सक्रिय सहभाग घेऊन आपले नाव मतदार यादीत असल्याची खात्री करून घ्यावी, तसेच आवश्यक दुरुस्त्या वेळेत करून घ्याव्यात, असे आवाहन केले आहे. अचूक आणि अद्ययावत मतदार यादी ही मुक्त, निष्पक्ष आणि पारदर्शक निवडणूक प्रक्रियेचा महत्त्वाचा आधार असल्याचे आयोगाने स्पष्ट केले आहे.